18 ਹਜ਼ਾਰ ਕਰੋੜ ਰੁਪਏ ‘ਚ ਟਾਟਾ ਸੰਨਜ਼ ਨੇ ਖਰੀਦੀ ਏਅਰ ਇੰਡੀਆ

0
56

ਨਵੀਂ ਦਿੱਲੀ (TLT) ਟਾਟਾ ਸੰਨਜ਼ ਹੁਣ ਏਅਰ ਇੰਡੀਆ ਦੇ ਨਵੇਂ ਮਾਲਕ ਹੋਣਗੇ। ਕੰਪਨੀ ਨੇ ਇਸ ਸਰਕਾਰੀ ਏਅਰਲਾਈਨ ਨੂੰ 18,000 ਕਰੋੜ ਰੁਪਏ ਦੀ ਬੋਲੀ ਲਗਾ ਕੇ ਖਰੀਦਿਆ ਅਤੇ ਸਪਾਈਸਜੈੱਟ ਦੇ ਅਜੈ ਸਿੰਘ ਨੂੰ ਇਸ ਦੌੜ ਵਿੱਚ ਪਛਾੜਿਆ ਹੈ। ਇਸ ਦੇ ਨਾਲ, ਹੁਣ ਟਾਟਾ ਸੰਨਜ਼ ਦੀਆਂ ਦੇਸ਼ ਵਿੱਚ 3 ਏਅਰਲਾਈਨਜ਼ ਹੋਣਗੀਆਂ।

ਏਅਰ ਇੰਡੀਆ 68 ਸਾਲਾਂ ਬਾਅਦ ਟਾਟਾ ਸੰਨਜ਼ ਦੇ ਕੋਲ ਵਾਪਿਸ ਆਈ ਹੈ। ਇਸਦੇ ਲਈ, ਸਰਕਾਰ ਦੁਆਰਾ ਬੋਲੀ ਲਗਵਾਈ ਗਈ ਸੀ, ਸਭ ਤੋਂ ਵੱਧ ਬੋਲੀ ਟਾਟਾ ਸੰਨਜ਼ ਦੁਆਰਾ ਲਗਾਈ ਗਈ ਹੈ। ਨਿਵੇਸ਼ ਅਤੇ ਜਨਤਕ ਸੰਪਤੀ ਪ੍ਰਬੰਧਨ ਵਿਭਾਗ (ਡੀਆਈਪੀਏਐਮ) ਦੇ ਸਕੱਤਰ ਤੁਹਿਨ ਕਾਂਤ ਪਾਂਡੇ ਨੇ ਕਿਹਾ ਕਿ ਮੰਤਰੀਆਂ ਦੀ ਕਮੇਟੀ ਨੇ ਏਅਰ ਇੰਡੀਆ ਲਈ ਜੇਤੂ ਬੋਲੀ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ।

ਸਰਕਾਰ ਏਅਰ ਇੰਡੀਆ ਵਿੱਚ ਆਪਣੀ 100% ਹਿੱਸੇਦਾਰੀ ਵੇਚ ਰਹੀ ਹੈ। ਏਅਰਲਾਈਨ 2007 ਵਿੱਚ ਘਰੇਲੂ ਇਕਾਈ ਇੰਡੀਅਨ ਏਅਰਲਾਈਨਜ਼ ਦੇ ਨਾਲ ਰਲੇਵੇਂ ਤੋਂ ਬਾਅਦ ਘਾਟੇ ਵਿੱਚ ਰਹੀ ਹੈ। ਸਰਕਾਰ 2017 ਤੋਂ ਏਅਰ ਇੰਡੀਆ ਦਾ ਵਿਨਿਵੇਸ਼ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਸੀ। ਪਰ ਉਦੋਂ ਤੋਂ, ਬਹੁਤ ਸਾਰੇ ਮੌਕਿਆਂ ਤੇ, ਯਤਨ ਸਫਲ ਨਹੀਂ ਹੋਏ ਸੀ। ਸਰਕਾਰ ਨੂੰ 100 ਫੀਸਦੀ ਹਿੱਸੇਦਾਰੀ ਵੇਚਣ ਦੇ ਬਦਲੇ ਟਾਟਾ ਤੋਂ 2,700 ਕਰੋੜ ਰੁਪਏ ਨਕਦ ਮਿਲਣਗੇ।